MKUU WA MKOA WA IRINGA AMINA MASENZA ASEMA WAFANYAKAZI WAZEMBE NA WASIOWAJIBIKA HAWAVUMILIWA

MKUU wa Mkoa wa Iringa, Amina Masenza amewakumbusha watumishi wa ofisi yake matarajio ya Serikali ya Awamu ya Tano na kuwataka wafanye kazi kwa kuzingatia weledi na nidhamu ili kufikia mafanikio yanayokusudiwa.

Akizungumza na watumishi hao, Masenza alisema Serikali chini ya uongozi wa Rais John Magufuli, ina dhamira ya kweli ya kuhakikishia watumishi wake wanatoa huduma bora kwa wananchi na si vinginevyo.

Alisema watumishi wazembe na wasiojituma, hawatapata nafasi ya kuendelea kuwepo kazini katika uongozi huu, hivyo ni vema wakajipanga na kufanya kazi kwa bidii ili kuendana na kasi ya Hapa Kazi Tu ya Rais John Magufuli.

 

“Hakuna mtumishi mzembe atakayesalimika kwa sababu Serikali haina mchezo. Ni vema mkakumbuka kuwa mnatakiwa muwajibike kwa kiwango kitakachowafanya wananchi wafurahie huduma bora, huku nchi ikisonga mbele kwa maendeleo,” alisema.

Aliweka wazi kuwa, utawala wa sasa umedhamiria kuleta mabadiliko ya kweli, kwa hiyo watumishi wa Serikali wanapaswa kushiriki kuleta mabadiliko hayo na si kufanya uzembe na uvivu kwa sababu mabadiliko yataanza nao.

Aliongeza kuwa Rais Magufuli alikwishaweka bayana kuwa hakuna kiongozi wa juu wala mtumishi wa Serikali wa ngazi ya kati na chini atakayefanya makosa katika uwajibikaji na kuachwa aendelee kuharibu kazi.


Katika hatua nyingine, aliagiza ufanyike uhakiki wa watumishi katika ofisi yake, ili kubaini endapo wapo watumishi hewa na kuelezwa sababu za uwepo wao ilhali mifumo ya udhibiti ipo. Tumelazimika kuirudia habari hii, kwa sababu katika gazeti letu la juzi, kichwa cha habari kilikosewa kwa bahati mbaya. Tunawaomba radhi wasomaji wote kwa kosa hilo.

Share on Google Plus

About darubini

This is a short description in the author block about the author. You edit it by entering text in the "Biographical Info" field in the user admin panel.